Asturies.com faise ecu de la noticia: acaba’l Conceyu Internacional de la Llingua Asturiana con una propuesta de collaboración ente diferentes zones del dominiu llingüísticu (a saber: Asturies, Lleón, Zamora y Miranda) col envís de crear un sentimientu d’identidá llingüística común. Les condiciones d’esti nuevu marcu de trabayu inclúin la non inxerencia ente territorios, que se tenga en cuenta la realidá llingüística de cada área y que seya ún d’esos territorios el que tome la iniciativa (obviamente se propunxo Asturies, por númberu de falantes principalmente).

Abúltame bona noticia, anque de xuru que los problemes qu’habrá enfrentar sedrán importantes. Pa entamar, yá hebo nel so momentu trebolgu cuando la presidenta de l’Academia fizo les declaraciones nes qu’afirmaba que la normativa asturiana yera flexible pa coles formes del llionés («¡La maldadosa Ana Cano átacamos col so panasturianismu arramplador de la diversidá!»). La esistencia d’esa “cláusula de non-inxerencia” ye muestra del mieu qu’esiste a que «mos quieran venir a dicir de fuera lo que hemos facer (o cómo hemos falar)». Nun sé hasta qué grau tan teniendo ésitu iniciatives como la propuesta de normativa “llïonesa” (recomiendo esti fantásticu analís nel blog Na lluna hai una vieya filando), pero atopo qu’en parte sedrá una bona vara de midir del ésitu de la normativa académica. Porque si la normativa asturiana realmente ye flexible y pue recoyer les variaciones diatópiques de la llingua, ¿por qué entóncenes surde una “normativa llïonesa”? Entrúgome si’l problema nun sedrá que nun se tien sabío desplicar qué y cómo ye realmente la norma asturiana, o si sedrá más bien que nun hai peor sordu qu’el que nun quier oyer, especialmente cuando les motivaciones nun son del too filolóxiques.

El casu de Mirada do Douro ye evidentemente otra cosa, con una normativa sofitada por una entidá como ye l’Anstituto de la Lhengua Mirandesa; sicasí, nun dexa de ser otra normativa más pa la mesma llingua…

En cualesquier casu, ye perprestoso ver cómo espoxiga la xuntura ente los dos llaos del cordal -ye de lo más lóxico- y, claro ta, con Miranda tamién.

Y mientres tantu en Cantabria siguimos al debalu, ensin normatives nin propies nin foriates, pero claro, eso yá ye otra hestoria.